2013 東歐遊 ~ Day 13 @ 去睇墓地 + 居然要趕飛機.....

 今日係last day啦, 所有要去既景點都去晒, 早幾日係到search到台灣人好鐘意黎既景點, 同我地酒店只差一個Merto站, 既然冇野做, 就黎行下啦~

先係酒店寄行李, 跟住出發啦~

Vysehard 高城區 ~ 其實係個半山既城仔, 有城牆圍住, 最出名係有個名人墓地(乜人唔記得), 因為係高左, 可以睇到城景架, 要多啲資料, 可以去blog到揾下~

冇day pass, 咁買單程票, 一個站咁近買 24Kc/30分鐘票就得啦, 一出閘唔識點行, 問左Metro員工, 佢話直行到尾左轉, ok, 行左一小段路就見到有指示架啦~

望下地圖, 嘩… 都好似幾大幾多野行喎~



後面個城牆就係高城區啦~



入去啦~



有個舊水泵水器, 梗係要去扮泵水影下相先啦~

啲路牌好得意, 但唔識睇, 哈~



見到目標啦~ Bazilika svaleho Petra a Pavla, 呢個教堂就係墓園區啦~

入去要比錢, 我地又係冇入到~

見到啲台灣人入去揾個乜乜名人既墓, 二少話新年流流唔好影唔好入, OK, 咁我影下門口啦~



跟住繼續行, 可以睇到河景架~

影完就繼續向前跟住城牆咁行啦~

有塊唔識睇既地標

其實圍住個城牆好長架, 不過天氣涷, 又唔夠藍天, 所以我地唔行, 回程返酒店果頭揾食
* 如果你有時間, 又有藍天, 真係可以黎行下架, 基本上呢到冇乜遊客黎, 冇廣場果邊咁多人, 靜靜地行下都係一個唔錯既選擇

係布拉格既last lunch係乜野, 哈….. 因為其實得返大約 700Kc左右係身, 反正西式食到悶, 所以去左昨日見到既中/日式餐廳~百福

呢間百福好勁, 日式係有迴轉壽司架, 我地梗係揀中式啦~ 日式既壽司得蟹柳, 三文魚, 旦, 冇香港咁多架

每枱都有既蝦片 ~ 中餐有樣好, 除左平, 呢碟蝦片唔收錢任你食架~



叫左壺茉莉花茶, 一位50Kc, 我地叫左一位, 因為係壺上, 所以兩個人都夠飲啦~

二少見到人地食, 佢又話要叫既中華沙律 ~ 味同香港食差唔多, 海草比較粗身, 而且好大碟呀, 價錢一啲都唔貴 50Kc 咋~

另外叫左兩set餐, 好有日式feel既盤, 有沙律, 湯, 餸同飯, 大約 120左右1set

二少叫左牛肉

我就叫左雞

呢餐埋單都係 332 Kc

食飽冇野做, 仲有成3個幾鐘, 決定出去濕平~

二少仲有塊包係身, 所以又玩雀啦~



呢到呢到仲勁, 會飛到你隻手到到食架~

玩完買完就返酒店攞行李走人啦~

去買張 32Kc/90分鐘既票去機場, 係Metro A : Dejvicka轉機場巴士#119 唔駛九個字就到機場, 好快~

~ 退稅 step 1
好簡單, 我未去Airline check-in, 攞住張e-ticket同單比海關, 佢就蓋章比我啦, 睇都唔駛睇, 完全好hea

搞完退稅就去check-in搞掂就行返去traveltax果到退稅啦

~ 退稅 step 2
由於係退當地貨幣, 係traveltax個rate冇咁靚, 所以係維也納到既歐羅都換算返做Kc, 蝕左少少
(維也納同布拉格都係可以退12%)

入左閘都有唔少商店架, 如果想買枝水同包, 要去rally呢啲便利店, 因為平好多架, 我地得返14X Kc, 如果係小食店, 只可以買最平既水同牛角酥, 但係係便利店就可以買到有肉既包架啦~

我地用緊餘既錢去買左個包同水, 買完去閘口到食野, 唉…. 原來廁所門口有水斟架….. 蝕左

~~~~~~~~~~~~~~~~~~~~~~~~~~~

好啦, 要講下我地點解要趕飛機啦~

先講我地既航班先
19:35 Prague > 22:55 Helsinki
23:40 Helsinki > 15:30 HKG

話說我地班機係 19:35 由prague > Helsikni 但係因為大雪關係遲左成個鐘先飛, 嘩… 我地下一程機咪過晒囉…. 不過唔緊要, 我一啲都唔緊張, 因為….
我地上一年係芬蘭返香港果日係歐洲大風雪, 我地班機delay左成3個幾鐘, 因為機司話要等埋轉機既乘客, 因為一日得一班機, 佢地駁唔到會好慘, 所以我地都係遲唔係好多啫~

不過有另外兩個布拉格既家庭好緊張, 佢地下一程既入閘時間係23:05, 上到機係咁係到問左3次個空姐, 最後果次佢話佢要安排第一個落機, 因為我地轉國際線仲要過passport control, 叫佢話比前面既搭客知, 我望返大家既登機證, 我地仲早佢成廿分鐘, 如果唔係搭過呢間airline, 我諗我都係會咁緊張囉…..

一到左Helsinki停定架機, 我地就跟住佢標出去門口等出去啦, 咁多次都未試過咁趕架, 哈….. 跟住個家庭就問邊到係過passport control, 我梗係跟住佢地尾啦, 好彩唔駛再過X光機, 唔係又要多幾分鐘啦~  話咁快我地就搞掂晒, 由落機去到閘口都係幾分鐘, 終於可以鬆口氣啦~~

我地係最後兩個上機, 真係有啲唔好意思, 哈….. 我都唔想架…. 本應諗住可以係機場掃下朱古力架麻, 點知係要趕囉…. 不過都因為天氣關係, 要遲多半個鐘先起飛到….

最後梗係安全回港啦, 不過行李就趕唔到轉機, 搞到要遲一日先送到返屋企

~~~~~~~~~~~~~~~~~~~~~~~~~~~



總括黎講, 風景係幾靚, 洗費一啲都唔貴, 但係來來去去都係咁上下, 二少去完都唔記得自己去左邊, 同埋我都預得太hea啦, 可以既話應該趕少少, 可以去多個city, 咁就會充實啲咁囉. 睇黎有一排都唔會黎歐洲架啦, 等我揾下第二啲地方先~