Day 1 新千歳空港すずらん > 千歳アウトレットモール・レラ > イオン千歳店 > ホテルグランテラス千歳 > 和食処 豊輪
**********
好耐都冇試過搭9點機啦, 所以都早左少少出門口, 不過好彩, 未夠7點就到左機場, 而且比想像中少人喎, 寄完行李就嘆返個早餐先上機
今次好搞笑, 我地都唔算好早到閘口, 但係到登機時間夾埋都係得果廿人係到, 所以第一次晨咁早就上左機啦, 架機仲有少少吉位, 所以坐我地隔離既人兄好快速咁自己閃開左, 正~
我繼續order我既低脂餐, 雖然好淡口冇味, 但係好過正餐好多, 二少話我仲乜唔幫佢order埋, 哈... 一陣話咁淡冇味我味又中招
經過幾個鐘, 準時飛到札幌啦, 天氣都唔錯咁喎~
雖然冇上次沖縄咁要成個幾鐘先搞掂, 但夾埋都要成40分鐘先出到大廳, 今次租toyota
不過都等佢車去分店搞手續攞車, 一架van係只招待一組人員, 所以我地兩個人包車
(同上次沖縄ots咁要等齊人, 真係差好遠, 仲要上次唔知點解last果組人遲我地成45分鐘先出到大廳囉)
大約5-10分鐘就到左 新千歳空港すずらん , 拿拿淋搞個手續就可以攞車出發啦
yeah, 十分鐘左右就搞掂, 自駕之旅正式開始啦~
今次我地架車, 好殘吓囉, 行左成九萬公里架啦, 仲有呀....個豬PS呀.... 同架車一樣咁舊, 完全唔update呀, 我又揾唔到有mapcode入, 好彩我有係navitime到search過行程同大約地點咋, 同有抄底啲地址咋, 起碼可以手指指慢慢係地圖到揾丫, 唔係我諗有一半既地方我會去唔到囉.....
去到第一站就開始天黑啦~
第一站....揀左近近地既 千歳アウトレットモール・レラ shopping
*其實想第一日就即刻落帶広架, 不過怕天氣差delay, 又怕夜左駕車會辛苦, 所以改左先停千歲一晚先慢慢玩上去啦
仲有唔少聖誕裝飾佈置
二少話肚餓, 所以拿拿淋揾下野食先, 揀左呢間 らあめん がんてつ
食評 : 冇驚喜, 冇特別囉
食完繼續行...
濕平完就去酒店check-in啦, 今次平平地住 ホテルグランテラス千歳 貪佢有free parking, 大浴場, 5千幾yen冇要求啦, 不過有台灣團, 仲住埋同一層, 但ok喎, 佢地唔嘈, 同埋我地冇join早餐, 所以完全冇問題, 哈~
搞好就出去揾野食, 過返去旺啲既街揾食, 但唔係間間店都有parking, 又多數係居酒屋, 炭火串燒店喎, 不過好彩最後揾到間食和食既 和食処 豊輪
不過唔知係咪我地夜左啲呢, 所以啲熱食冇晒, 變左得壽司/魚生飯, ok唔梗要, 呢啲仲啱我地, 哈~
二少揀左魚生飯 ~
我就揀左壽司set
食評 : 二少佢激讚呀, 啲海膽好好味(佢唔佷香港果啲, 話有陣味), 刺身又新鮮, 邊食邊話掂, 仲係咁多日食過既好既魚生呀, 呢餐真係唔錯架, 掂~99分
食完就去埋Aeon イオン千歳店 八卦啦, 不過由於太晏, 啲舖關門, 只可以係超市買左少少飲品同埋大大粒既士多啤梨啦
真係好大粒囉
唔知點解, 成個沖縄同我北海道途經既地方, 啲士多啤梨都係咁貴既? 細粒既500-600yen, 大粒既要成980yen, 明明係東京食係好平架麻......
* Aeon イオン 係我地今次自駕遊既最街濕平地點, 雖然佢係收九點, 但帶広, 釧路都有, 而且仲係大大間, 勁多shop呀, 晚晚食完飯都去行一轉
沒有留言:
張貼留言